Transport Strike

Noong Lunes, September 19, 2011, naglunsad ng malawakang protesta ang mga kaibigan nating mamang tsuper ng jeep na ang sabi nila ay pumaralisa ng 70% sa Metro Manila. 90% naman sa ibang lugar. Sa isang malaking siyudad tulad ng Metro Manila, malaki ang epekto nito sa negosyo lalo na’t dito nakasentro ang komersyo ng bansa. Sigurado akong marami ang nahuli sa pagpasok sa kanilang mga trabaho. Napakalaking abala nitong ginawa nilang ito.

Pero ang tanong ko lang. May naidulot ba na maganda ang ganitong protesta? Nanalo na ba sila laban sa tatlong malalaking oil companies dito sa Pilipinas? Parang wala yata akong matandaang nagprotesta sila tapos ay pinakinggan sila ng mga ito. Wala din akong matandaan na napababa nila ang presyo ng langis sa pamamagitan ng pagrarali. Meron ba? Parang wala pa yata?

Ang totoo pa nga nito, marami talaga ang hindi natuwa sa ginawa ng mga raliyista. Namimilit sila ng ibang driver na makisali sa kanila. Binubutas nila ang mga gulong ng mga ayaw makilahok sa kanila. Tapos nagplanking pa sila sa gitna ng kalsada. Yung iba naman sinadyang humiga para maharangan ang mga sasakyan. Katakot takot na trapik tuloy ang nangyari.

Ang tingin tuloy ng iba dito sa mga mamang tsuper ng jeep, parang sarili lang nila ang kanilang iniisip. Paano naman ang ibang masisipag na nagtatrabaho at hindi pwedeng mahuli sa pagpasok? O kaya mga bata na kailangang pumasok sa eskuwelahan? O kaya isang pasyente sa isang ambulansya na kailangang ihatid sa ospital?

Konting respeto lang sana. Kung karapatan nila ang ipahiwatig ang kanilang saloobin sa pamamagitan ng pagrarally, may karapatan din naman ang ibang taong tumutulong din sa pagpapa-unlad ng ekonomiya ng bansa na hindi maabala sa kanilang mga gawain.

Ang solusyon

Pero alam nyo may solusyon naman sa ganitong problema. Bakit kaya hindi nyo subukang magbisikleta? Mura lang naman ang bisikleta at hindi kailangang mamahalin.

Marami lang kasi sa atin, maaarte. Sa ibang bansa, kahit anong klase ng damit ang suot nila, pumapadyak sila. Kahit nakapang-opisina na sila. Yung mga babae nga, kahit nakapalda pa eh. Ayaw pagpawisan. Ewan ko ba? Hindi ko maintindihan eh pwede namang magpunas. Magkano lang naman ang good morning towel. Ayaw maarawan o mainitan. Hello! Mas mainit kaya sa impyerno. Kaya magpraktis na kayo. At higit sa lahat, may pagkatamad. Ang gusto laging nakaupo sa aircon bus o kaya sa MRT. O kaya naman sa taxi.

Subukan nyong magbisikleta. Masarap kaya. Sa sitwasyon ng kalsada natin tuwing rush hour, mas mabilis ang magbisikleta kapag papasok sa trabaho. Kahit pupunta ka ng mall. Kahit araw-araw pa silang mag strike, hindi ka maaapektohan. Tumaas man ang gasolina, ayos lang. May bisikleta ka, makakapunta ka pa rin sa pupuntahan mo.

Kung ayaw mong maabala, magbisikleta ka

Walang may gusto sa atin na maabala o makaabala sa pagpasok sa trabaho o kaya sa kung anuman ang iyong lakad. Pero may magagawa ka naman huwag ka lang maarte at huwag ka lang tamad. Oras na para imulat natin ang ating mga mata para sa iba pang alternatibong transportasyon. Subukan nyong magbisikleta, hindi nyo pagsisisihan.